v1 Síðan buðu Móses og Ísraels elstu fólkinum og søgdu: «Varðveitið øll tey boðorð, sum eg bjóði tykkum í dag! v2 Tá ið tit eru komnir yvir um Jórdan inn í landið, sum Harrin, Guð tín, man geva tær, tá skalt tú reisa upp stórar steinar og smyrja teir við kálki v3 og rita á teir øll orð í hesi lóg, so skjótt sum tú ert komin yvirum, til tess at tú mást koma inn í tað land, sum Harrin, Guð tín, gevur tær, land, sum flýtur í mjólk og hunangi, eins og Harrin, Guð fedra tína, hevur lovað tær. v4 Og tá ið tit eru komnir yvir um Jórdan, skulu tit reisa upp hesar steinar, sum eg havi boðið tykkum í dag, á Ebals fjalli og smyrja teir við kálki. v5 Og har skalt tú reisa Harranum, Guði tínum, altar, altar av steinum, sum jarnamboð ikki hevur verið reiggjað yvir. v6 Av óhøgdum steinum skalt tú reisa altar Harrans, Guðs tíns; og á tí skalt tú ofra Harranum, Guði tínum, brennioffur; v7 og tú skalt slátra takkaroffur og halda máltíð har og vera glaður fyri ásjón Harrans, Guðs tíns. v8 Og á steinarnar skalt tú greiniliga rita øll orðini í hesari lóg.»

v9 Síðan talaðu Móses og Levitaprestarnir til allan Ísrael og søgdu: «Gev nú ljóð, Ísrael, og lýð á! Í dag ert tú vorðin fólk Harrans, Guðs tíns. v10 Tí skalt tú lýða rødd Harrans, Guðs tíns, og halda boðorð hans og skipanir tær, sum eg í dag leggi fyri teg.»

v11 Tann dagin beyð Móses fólkinum og segði: v12 «Hesir skulu standa á Gárizim fjalli til tess at vælsigna fólkið, tá ið tit eru komnir yvir um Jórdan: Símeon, Levi, Júda, Issakar, Jósef og Benjamin. v13 Og til tess at lýsa banning skulu hesir standa á Ebals fjalli: Ruben, Gád, Ásjer, Zebulon, Dán og Naftali.

v14 Og Levitarnir skulu taka til máls og við harðari rødd siga við allar Ísraelsmenn: v15 Bannaður veri tann maður, ið ger sær skurðgud ella stoypta gudamynd, Harranum andstygd, og handaverk av smiði, og reisir tað í loyndum. Og alt fólkið skal svara og siga: Amen! v16 Bannaður veri tann, ið vanmetir faðir sín og móður sína! Og alt fólkið skal svara: Amen! v17 Bannaður veri tann, ið flytur markaskil næsta síns! Og alt fólkið skal svara: Amen! v18 Bannaður veri tann, ið leiðir blindan mann av leið! Og alt fólkið skal svara: Amen! v19 Bannaður veri tann, ið reingir rætt útisetans, faðirloysingans og einkjunnar! Og alt fólkið skal svara: Amen! v20 Bannaður veri tann, ið hevur samlegu við konu faðirs síns, tí at hann hevur lyft upp áklæði faðirs síns! Og alt fólkið skal svara: Amen! v21 Bannaður veri tann, ið hevur samlegu við nakað djór. Og alt fólkið skal svara: Amen! v22 Bannaður veri tann, ið hevur samlegu við systur sína, hvørt hon er dóttir faðirs hans ella móður hans! Og alt fólkið skal svara: Amen! v23 Bannaður veri tann, ið hevur samlegu við vermóður sína! Og alt fólkið skal svara: Amen! v24 Bannaður veri tann, ið drepur næsta sín á loyningum! Og alt fólkið skal svara: Amen! v25 Bannaður veri tann, ið tekur við mutri til tess at bana sakleysum manni! Og alt fólkið skal svara: Amen! v26 Bannaður veri tann, ið ikki heldur í gildi orðunum í hesi lóg, so at hann ger eftir teimum! Og alt fólkið skal svara: Amen!