Tað boðar Danska Bíbliufelagið frá í einum tíðindaskrivi hósdagin.

– Heiðurslønin er ein tøkk fyri hennara lívslanga virki innan trúgv og kirkjulív í Danmark, og hennara lut í at greiða frá týdninginum, sum Bíblian hevur í danska samfelagnum, stendur í grundgevingini.

Bíbliufelagið sigur seg hava til endamáls, at fremja bíbliunýtslu, bíbliulesnað og bíbliukunnleika. Við heiðurslønini vil felagið viðurkenna tey, sum hava hjálpt við hesum.

Í tíðindaskrivinum verður drotningin lýst sum ein "trúfastur verji fyri Bíbliufelagið í áratíggju."

Hon fær m.a. rós fyri síni átrúnaðarligu listaverk við bíbilskum evnum.

Drotningin hevur, við sínum opinleika um trúgv og við støðugari luttøku í kirkjum kring alt landið, skapað eina fólkaliga og jaliga mynd av trúgv í praksis, sigur formaðurin í nevndini fyri Bíbliufelagið, Peder Ø. Andreasen.

– Hon hevur, við síni nærveru í kirkjurúminum – á jøvnum føti við kirkjufólkið – verið við til at gera kristindómin meira natúrligan og styrkt leiklutin hjá kirkjufólkinum í donsku fólkakirkjuni.

Heiðurslønin er 10.000 krónur og eitt innrammað heiðursbræv við Bíbliuni hjá Christian IV frá 1633.

Skrivað: Ásbjørn Jacobsen